Prome y durante eleccion, AVP a priminti di entre otro sera Serlimar, awor San Nicolas y vecindario, pero tambe Aruba henter en general ta haña otro golpi “below the belt.”

Awor minister Visser aparentemente ta na punto di deshaci di e centro cardiologico/tema-hospital na Centro Medico! 

Un di e motibonan cu Visser ta duna ta, cu e hospital lo no ta factibel. Aki Visser, kende ta aparenta di tin salud di hende na pecho, ta pone e interes di e hende, e patient, un banda, y ta pone mas atencion na e aspecto financiero, locual ta comprendibel tambe en vista di su interesnan particular den e negoshi di remedi di 40miyon!

Awor, den su afan pa justifica e idea di Visser, ata Mike Eman himself ta acudi na mentiranan flagrante encuanto e servicionan di e hospital, esta cu e centro lo NO tin un camber di operacion, no tin un ICU (intensive care unit), no tin catlab, etc. Pa contra-aresta e ponencia y e mentiranan di Mike, ata aki algun di e diferente servicionan di e hospital: 1 sala di operacion cu 9 cama; 2 aparato pa cateterizacion y un 1 catlab. Esaki sin conta e 9 stoelnan di dialyse cu lo mester a bin. Cu esaki e centro lo mester bira un “tema-hospital”, esta na unda tur e servicionan di un hospital normal, lo ta disponibel tambe. Pues de facto lo por a papia aki di un “1 stop shopping hospital”!!

Den campaña Visser a bisa di lo bini cu expertonan Hulandes, pa pone e Centro na hospital na Playa. San Nicolas NO a comprende e enbergadura di e mensahe y a vota pa e cierre di e centro! Sinembargo, di otro banda, Mike den campaña a priminti progreso pa San Nicolas. Y awor Mike ta bira lomba pa San Nicolas y vecindario, door di sostene e intencionnan di Visser.

Den e programma di e centro cardiologico tabata e intencion pa nos PROPIO yiunan di tera tuma na nan encargo e procedura di cateterisacion y operacionnan cardiaco. Tabata e intencion pa nombra un joven cardiologo arubano den servicio di Centro Medico (IMSAN), pero como cu Visser a duna instrucion pa no emplea e arubiano aki, lamentablemente a duna e joven aki e oportunidad di uni su mes na e centro cardiologico priva di dr. Van Leeuwen y dr. Cheng.

De paso critica a wordo lanza pa e hecho cu e director di Centro Medico tabata ocupa tres funcion, esta hefe di Salubridad Publico, hefe di Inspeccion di Salubridad Publico, y director di Centro Medico. Un critica cu ta carece di tur seriedad, como cu esaki tabata pa añanan largo e situacion, esta un hefe y/of director di e diferente departamentonan! E critica tabata dirigi riba un yiu di tera, pa colmo un yiu di San Nicolas, kende pa tur tres e funcionnan menciona tabata cobra un salario total di mas o menos 10.000 florin; compara esaki cu e hecho cu Visser awor pa un di e funcionnan aki a trece 1 “jeugdarts” aden (by the way: na Aruba nos tin 4 jeugdarts local!) cu un salario di entre 20.000 y 23.000 bubu. Si pa e otro funcionnan Visser trece 2 Hulandes aden, esey kier meen cu en total e gastonan salarial pa luna lo bira 3 x 20000/23000, pues entre 60.000 y 69.000 bubu, contra e 10.000 di e yiu di tera!!

Cu e maniobranan aki di Visser NINGUN accion riba tereno di salud lo por ta factibel!

Ta resta un posicion pa e habitantenan di San Nicolas y vecindario: NO acepta cu e gobierno aki ta priva boso di serviconan di un hospital den bo mesun distrito!! Demostra bo desacuerdo durante e encuentro di gobierno na Bonaire Club riba diahuebs, 11 maart pa 8or di anochi!

---

Social Bookmarking