Eugene Kingsale “Si nos tur duna un man y stop di bringa otro, Aruba y nos tur ta yega hopi leu”

ORANJESTAD- Minister di Deporte dr.Richard Visser a habri e rueda di prensa di ayera felicitando tur hende muhe riba dia. El a splica masha cortico

mes encuanto e problema di obesitas y e solucionnan pa esaki, pero cu e lo amplia riba e asunto serio aki otro biaha. Minister Visser despues a bai di biaha over pa loke realmente tabata molestie. Banda di dje sinta tabata e pelotero Arubiano conoci mundialmente Eugene Kingsale. Minister Visser a bisa cu na Aruba nos mester cuminsa respeta y aprecia nos propio hendenan, nos propio profesionalnan, sigur ora nan kier haci algo bek pa nan pais. Den un medio di prensa Eugene Kingsale tabata blanco di critica mahos y innecesario.

Esaki ta algo cu nos no mester acepta, ya cu e gran deportista yiu di tera aki hunto cu su fundacion “Eugene Kingsale Foundation” ta aki pa yuda y promove sin ningun interes propio e deporte di baseball pa hobennan talentoso Arubiano. Riba invitacion di gobierno di Aruba Eugene Kingsale a  tira un bista riba e veld di Winston cu ta bou contruccion actualmente pa wak condicion di e veld y sugeri gobierno kico ainda por wordo haci y si e trabounan eynan ta cuadra cu seguridad di esnan cu ta bai haci uso di e veld aki. Despues di a inspecciona e veld, Kingsale a bin cu algun sugerencia pa gobierno con pa mehora e veld pa por haci uso optimal di dje. Un avalancha di critica di un medio di comunicacion na adres di Eugene Kingsale tabata consecuencia di esaki.

Minister Visser tabata hopi indigna cu e atake aki y a bisa cu un blow riba Eugene Kingsale ta un blow riba henter Aruba. Eugene Kingsale mes tambe a hiba palabra. El a cuminsa na bisa cu e kier ta bon cla pa tur hende cu e no ta un politico. Ta riba invitacion di Minister Visser el a bai haci inspeccion riba e veld di Winston y como un pelotero profesional el a manda su sugerencianan pa Minister Visser. Nada mas ni nada menos. “Mi no a critica ningun hende”, asina Eugene Kingsale a sigui splica. “Mi ta e prome yiu di tera cu a hunga pa Grandes Ligas, prome na Merca despues na Hulanda. Dos biaha mi a participa na weganan Olimpico”, asina Kingsale a bisa prensa.

Ademas e ta un persona cu a wordo condecora dor di La Reina. Mirando tur su logronan y experiencia e no ta kere cu ta husto cu e ta wordo yama un pelotero floho y fracasa. “Si nos tur duna un man y stop di bringa otro, Aruba y nos tur ta yega hopi leu”. Nos mes ta pone nos propio hendenan abou”,  tabata palabranan di Eugene Kingsale ayera. Como un yiu di tera cu a lanta, hunga, crece y biba aki e kier haci algo bek pa su pais. E y su fundacion ta bai traha riba e veld banda di Baby Beach pa construye di tal forma cu hobennan di Aruba por cuminsa practica e deporte di baseball eynan. Tambe lo drecha e cancha di tennis eynan. Tur esaki ta plannan cu ainda ta den deliberacion, pero cu sigur lo wordo ehecuta.

---

Social Bookmarking