ORANJESTAD- Siman pasa funcionarionan di oficina di Minister Benny Sevinger hunto cu polis di bario y City Inspector a pasa inspecciona varios santana di auto.

A papia cu e doñonan di e lugarnan aki y a pidi nan permiso pa deshaci di e autonan bieu cu ademas di ta duna un mahos bista, ta un criadero di djaca, tur sorto di insecto y tambe malesa. E doñonan a duna permiso y ayeramainta tempran Minister Sevinger y funcionarionan di su despacho a bai prome na un santana di auto na Bushiri pa wak con e trabou ta bai wordo haci.

A toca honor na Minister Sevinger pa duna inicio na e trabou dor di primi riba un knopi pa asina placha e prome auto bieu. E autonan placha ta wordo hiba dump unda nan lo keda mientrastanto te ora duna permiso na un compania cu ta bai manda e metal afo pa e wordo recicla. Tin tres compania interesa pa haya e permiso aki, pero te ainda no a tuma un decision definitivo cua compania lo bai wordo encarga cu esaki. Mientrastanto e trabounan ta sigui y ayera caba un cantidad grandi di auto bieu a wordo hala di caminda.
   

---

Social Bookmarking