ORANJESTAD- Gobierno di Mike Eman a priminti di lo cumpli cu pensionadonan y ayera mainta e protocol den cua e promesa aki ta wordo determina, a wordo firma pa Prome Minister di Aruba mr.Mike Eman y Presidente di OPPA , sr.Paul van Niel. 

Prome Minister Eman a relata na prensa cu desde e proceso di formacion di su gobierno y tambe despues cu gobierno a keda instala, el a hiba deliberacionnan cu sr.van Niel y su directiva pa papia riba e pensioen di e empleadonan publico. For di 2001 te cu 2008 e pensioen no a wordo ahusta, loke ta un incumplimento grandi di deber di e gobierno anterior. Na 2008 ora empleadonan publico a subi caya pa protesta y pidi atencion pa nan haya indexering, e pensionadonan tambe a participa na e marcha di protesta aki cu a dura varios siman. 

Ora gobierno anterior a yega na un acuerdo cu e empleadonan publico y a firma un acuerdo cu OPPA tambe, e pensionadonan cu a kere di lo haya nan parti husto cu ta e suma di 105 florina pa luna, a keda desagradablemente despunta ora cu gobierno a bin cu un sistema cu segun un sorto di calculo di percentahe e pensionadonan no ta haya e suma di 105 florin manera priminti, pero solamente parti di dje. Prome Minister Eman a bisa cu papiando na diferente ocasion cu e pensionadonan el a sinti nan preocupacion. Eman a bisa cu e gobierno aki sin duda kier duna e pensionadonan mas, pero a hereda un debe grandi di 2 biyon florin y 300 miyon na deficit di presupuesto.

Premier Eman a bisa cu nan lo honra e pensionadonan pa loke a keda acorda na 2008 y ta pesey cu den un protocol bon formula ta wordo stipula cu for di 1 di januari 2010 e pensionadonan di OPPA lo haya e suma completo di 105 florin pa luna. Na luna di juni di e aña aki e suma di 105 lo wordo paga completo y cu forsa rectroactivo.    Prome Minister a sigui bisa cu te ainda tin gruponan di empleado den nos comunidad cu ora nan baha cu pensioen no ta hayando un pensioen husto. Por ehempel empleadonan di fundacionnan manera SABA cu ta cuida nos grandinan. Nan no tin un bon pensioen regla.

Den esaki gobierno lo trece cambio y lo cuminsa cu SABA na unda lo introduci un pensioen husto pa esnan trahando eynan y despues lo sigui cu otro fundacionnan. E gobierno aki kier introduci tambe un pensioen general. Atencion special ta bai na pensionadonan soltero. For di gobierno ta mira con pa yega na un toeslag pa e pensionadonan aki. Despues cu sr.van Niel tambe a hiba palabra, e protocol a wordo firma.   

---

Social Bookmarking