Director di WEB Aruba NV, Oslin Boekhoudt, presente na Sala di Conseho di Minister ayera, pa firma e protocol cu LVV cu lo otorga awa di spula na un prijs preferencial pa contribui cu e agricultornan y criadornan di bestia specialmente den e temporada di secura a duna un splicacion riba e proceso aki.

El a indica cu e awa di spula ta e mesun awa di bebe, a pesar cu e no ta pa consumo humano e ta di bon calidad y por wordo usa pa consumo di bestia y tambe pa irigacion. E prijs cu nan lo pone  pa e awa ta solamente e gastonan extra cu nan lo tin pa captura e awa y pone disponibel. WEB tin un schedule di spula e tuberianan y LVV lo wordo poni na altura di esaki pa busca e awa.

Minister Otmar Oduber ta indica cu ta trata aki di un cooperacion estrecho entre instancianan pa por tin un schedule delanta di un siman caminda WEB lo notifica LVV e lugarnan caminda lo spula pa busca e awa. LVV na su turno a base di e registracion cu nan tin di agricultornan na Aruba lo reparti e awa aki entre nan a base di e prijs cu tabata cobra pa awa di dam. Aki Minister Oduber a indica si cu lo por discuti ainda si e prijs lo por bira un tiki mas preferencial.

Meta di esaki segun e mandatario ta pa motiva e agricultornan pa continua y yudanan tambe den e proceso pa por haci’e mas eficiente y productivo pa nan y asina nan por aumenta e cantidad di producto cu nan ta produci. Esaki lo por yega na e punto cu lo por bende e productonan aki mas barata pa consumo local.

Minister Benny Sevinger a gradici di su banda tur persona envolvi den e proyecto aki. E ta considera cu esaki ta un solucion cu lo alivia y duna un speranza na e agricultornan awor y pa futuro tambe ora tipo di situacionnan di secura asina presenta.

James Ramos, agricultor Arubiano, ta indica cu e solucion aki lo yudanan basta hopi, specialmente awor den temporada di secura. Den nomber di diferente agricultor y horicultor, James a gradici e cooperacion di WEB y DOW.

E proceso aki ta andando caba y for di cuminsamento di otro siman nos agricutornan y criadornan di bestia lo cuminsa wak un alivio den e suministro di awa pa nan plantacionnan y bestianan.

Di e forma aki Gabinete Mike Eman un biaha mas ta mustra cu cada un di nos riba e pida baranca aki ta importante y ta trahando dia aden dia afor pa mehora no situacion pa awor y pa futuro.

---

Social Bookmarking