Compleho Deportivo SDK na Corsow tabata sede di tur encuentro deportivo entre e scolnan di e islanan Aruba, Boneiro y Cosow. Volleyball como deporte a inicia e Weganan Interinsular 2010.

 

E hobennan di Cacique Macuarima School a representa Aruba na e Weganan Interinsular 2010. E delegacion a keda forma pa Deion Geerman, Josmar Thiel, Quenten Landburg, Tjoris Wever, Orvin Koolman, Yi-Xiong Feng, Raul Morales, Rowald Loopstok, Diego Mira-Zapata, Alexis Vrolijk, compaña pa docentenan y coach Edgard Vrolijk y Richard Simon. Despues di a gana e torneo di Volleyball Escolar den categoria B-mucha homber pa di 4 aña consecutivo, nan a haya oportunidad pa bay hunga na Corsow.

Diabierna atardi e prome wega a tuma lugar y tabata entre Kolegio San Hose di Corsow y  Kolegio Reina Beatrix di Boneiro, cual wega e hobennan di Boneiro a sa di gana cu score di 25 pa 6 y 25 pa 11.

Siguiente wega tabata di Aruba cu a enfrenta e hobennan di P.L. Brion di Corsow. Nerviosismo di parti di Cacique Macuarima School ta pone cu P.L. Brion ta domina e wega y ta logra gana den dos set sigui cu score di 26 pa 16 y 25 pa 18. Despues di e weganan di volleyball a tuma lugar e apertura oficial di e ‘Weganan Interinsular Escolar 2010’ cu e aña aki a inicia na Corsow. 

E weganan di volleyball a continua diasabra mainta, cu Cacique Macuarima School di Aruba enfrentando Kolegio Reina Beatrix di Boneiro. Den e prome set, Boneiro ta sali duro y sigur pa gana cu e score di 25 pa 11. Pero den e di dos set, e hobennan di Cacique Macuarima School ta haya confiansa y ta cuminsa hunga nan wega di custumber pa termina e set cu score di 25 pa 19. Aki ta unda e wega di volleyball ta sinta y e hobennan di Aruba ta supera Boneiro pa gana e di tres set finalmente cu score di 14 pa 9. 

Den e wega cu a sigui P.L. Brion di Corsow ta gana Kolegio San Hose di Corsow den dos set, 25 pa 3 y 25 pa 10. P.L. Brion despues ta enfrenta Kolegio Reina Beatrix di Boneiro cual wega den prome set Boneiro ta bataya fuerte, pero ta logra cay venci cu e score di 25 pa 23. Den e ultimo set P.L. Brion ta sigura e wega di trempan y ta logra gana cu e score di 25 pa 17.

Aruba ta hunga e ultimo wega di volleyball enfrentando Kolegio San Hose di Corsow. Den e wega aki, e hobennan di Cacique Macuarima School ta demostra pakiko nan ta campeon di e categoria aki na Aruba y ta gana den dos set facil cu score di 25 pa 7 y 25 pa 9. 

Resultado despues di tur wega ta duna cu P.L. Brion di Corsow ta bira campeon di volleyball escolar pa Weganan Interinsular 2010. Cacique Macuarima School di Aruba ta termina na di dos lugar como Sub-Campeon, Kolegio Reina Beatrix di Boneiro na di tres lugar, mientras cu Kolegio San Hose di Corsow ta keda na di cuater lugar. E premio di MVP a bay pa Shuruendy Valeriano di P.L. Brion di Corsow.

IDEFRE ta felicita Cacique Macuarima School cu nan logro na Corsow y ta motiva nan pa sigui train pa por logra retene e titulo di campeon di Aruba pa di 5 aña consecutivo durante competencia escolar proximo.